زاهاك وإله النور | الجزء الاول

 
قبل اكثر من أربعة الاف عام .. جانت الأرض غير الأرض .. والسماء غير السماء .. جان اكو ملك عظيم حكم الأقاليم السبعة ، حكم الانس والجن وتمرد وتجبر على كل الأعراف والقوانين والاله وتمرد حتى على الشيطان ، حكم العالم بأيد من حديد وهو واحد من ملوك الأرض الأربعة .

راعي غنم عجوز يرعى اغنامة ويغني بوسط المروج الخضراء وجان يحس بالسعادة ، ومنو الي ميحس بالسعادة وهو بنص مملكة اشور القديمة القريبة من مدينة بابل اعظم مدينة شافتها عين انس او جن بالتاريخ ، هذا الراعي اسمة ( إيشما ) .
 
جان ايشما يكدر انو يباوع على بركة المي الي ديمشي يمهة ويشوف كل الأسماك والاصداف الي بداخلهة كانو ديباوع على الطيور وهي بالسمة , قبل اربعتالاف سنة جان كلشي طاهر ونقي .
 
قرر ايشما انو يستريح شوية وراح يم شجرة تعود انو يترك اكلة يمهة .. بس تفاجء لان شاف متاعة مفتوح ,
وكام يتمم ( هؤلاء اللصوص لن يتعلموا ابداً .. لو انهم سالوني طعاماً لاعطيتهم ) .
 

استغرب ايشما لمى فتح متاعة وشاف الاكل موجود والحليب موجود عدى الجبن الي ماخوذ منة شوية .. كمية لا تشبع ولا تسمن , كعد ايشما واكل وشرب واستراح بظل الشجرة وبعدين نزل يسبح بالبركة مال مي , اثناء ما هوة موجود بالبركة وديسبح ، لاحظ انو اكو سرب مال حمام حط يم المتاع مالتة وبدا الحمام يأخذ الي يكدر ياخذة ويطير لمكان مو بعيد ويرجعون يعيدون نفس الشي من جديد .
 
طلع ايشما من البركة وراح للمكان الي دتنقل الة هاي الطيور الاكل وشاف شي اتسعت الة عيونة بدهشة وانبهار , لكة طفلة جميلة ابنة التسع سنين مشاف بحياتة بجمالهة ، والي ادهشة اكثر هو انو الحمام دينقل الاكل لهاي الطفلة .
 
جانت الطفلة تضحك وتحرك ايديهة بسعادة ولما اقترب منها ايشما ضحكتلة بطريقة نزلت دموعة لبرائتهة ، شالها ايشما برفق ورفعها للسماء وجانت الحمامات اطير داير مدايرهة بسعادة ملكالهة تفسير , قرر ايشما انو يأخذ هاي الطفلة ويا ويربيهة وقرر انو يسميها اسم اوحاة الة هذا الموقف ، سماهة ( سميراميس ) وهذا الاسم بالبابلية القدية يعني ( محبوبة الحمائم ) .
 
الاحتفال العظيم ابابل ولما تحتفل بابل فزيد على جمالهة الف جمال , الجبال الخضراء والسهول والانهار الصافية والرخام الأبيض والازرك الي يميز القصور البابلية والرسومات الجبيرة الي تغطي الجدران .. كل هذا وية الأطفال الي ينثرون أوراق الزعفران بالهوة والخيول الي تتراقص بالشوارع والبشر الي يحتفلون بأكثر ملابسهم وصروحهم اناقة , ساعتهة راح تعرف انو اكو حدث مهم رح تعرف انو اكو مولود جديد للملك ( كوش ) مولود ذكر لان هاي الاحتفالات متصير بهالشكل اذا جان المولود انثى .
 
وهذا هوة المولود موجود بالهودج وتحيط بي الولادات وداير مدايرة رح تسمع جمل مثل .. يالروعة هاتين العينين .. او .. انه أروع طفل راته عيناي .. هذا الطفل هوة الجمال مجسد براس وعينين حادتين , بس الغريب والي محد يلاحظة انو هذا الطفل مو بس الولادات الجميلات يحيطن بي الشياطين هم جانت داير مداير الهودج وجانو يبتسمون بطريقة تجيدهة كل الشياطين وجانو يقرون داير مدايرة فدشي محد يكدر يعرفة .
وفجأة سكت الكل وحجة شيخ جبير وكال ( اليوم اتشرف وتتشرف البشرية وتتشرف الأرض كلها بولادة الابن الذكر الذي سيحمل اسم الملك العظيم كوش .. الابن العظيم الذي قررت العائلة ان تسميه زاهاك )
 
ضج المكان بالصيحات والهتافات والصافرات وبدت الاحتفالات , بس الغريب انو هذا الاسم مجان اسم محبب زاهاك بالبابلية القديمة يعني ( الثعبان اللاسع ) , وعلى ذكر الثعابين جانت الشيطاين الي تحيط بالهودج الهة ضحكات تشبه فحيح الثعابين .. فحيح شيطاني سعيد .
 
باوع ايشما على هاي التحفة الانثوية النايمة الي كانما نزلتلة من السماء والي سماهة هوة سميراميس , كال بنفسة اني مجرد راعي فقير اقضي اكثر يومي جوعان وهاي التحفة مكانها مو هنا بنص هاي الجدران المتهالكة الي عايش اني بيها , اكيد الالهة ضامة لجمالهة مكان اكثر اناقة , وبهاي اللحظة انفجرت بدماغة فكرة عظيمة تخص سميراميس .
غداً سيفتح سوق نينوى العظيم والي يتوافق وية موسم الزواج الي يصيير كل سنة ابابل , الي يجتمع بي الشبان والبنات من كل ارجاء مملكة اشور العظيمة وينتقي كل شاب عروس تناسبة , او يشتري الكهول بنات صغار يربوهن حتى يوصلن لسن الزواج ويتزوجهن او يزوجوهن لاولادهم وقرر ايشما انو يأخذ سميراميس لسوق نينوى .
 
لبس ايشما افضل ما عندة واخذ ساميراميس واتوجه لنينوى ورغم كل هذا جان ايشما مظهرة كمظهر متسول بوسط هذا السوق الي يتنافس بي كل شاب ورجل حتى يحصل على بنت ذات حسن وجمال وجانت سميراميس تضحك ضحكتها الي تسحر كل الي يشوفهة ويندهش بسبب وجود هيج جوهرة وية هيج متسول .
 
بنفس هذا الوقت جان ( سيما ) ناظر خيول الملك يمر بالسوق ويبحث عن احسن الخيول حتى يشتريها للملك , وبدون ميدري واذا بعيونة وكعت على سميراميس الصغيرة نسة سيما الخيول ونسة الملك ونسة كل شي وتذكر شغلة وحدة , أتذكر انو هوة عقيم وميصير عندة أطفال , وبقة سارح بجمال سميراميس وبعيونهة الي تسحر الناظرين , ترك سيما كلشي وتوجه للراعي العجوز ايشما .
 
باوع ايشما على ملابس سيما الملكية وعرف انو هوة من بلاط الملك , ابتسمت الطفلة سميراميس لسيما بسحر دقتلة كل دقات الابوة بكلب سيما , رفعها للسماء بسعادة وطلع من جيبة جيس مليان بالعملات الذهبية جان رح يشتري بي افضل الخيول للملك وانطا لايشما , باوع ايشما للعملات الذهبية بلهفة وسعادة وباس ايد سيما وراح بطريقة يغني .
 
جانت اكو منصة جبيرة وتتميز بالزغرفات والرموز البابلية القديمة ويفوت بيها المي بطريقة خيالية متكدر تتصورهة وداير مدايرهة فتيات من اجمل ما يكون وبنصهن شاب وسيم ومليان فتوة كل هذا بداخل احد القصور البابلية وهذا الشاب الوسيم هوة زاهاك ابن الملك كوش بعد مرور 100 سنة ولتستغرب اعمار البشر بهذاك الزمن جان مابين الـ 500 والالف .
 
بهاي اللحظات الحلوة الي يعيشهة زاهاك واذا برجل عجوز كسيح قبيح المنظر شكلة اقرب للشياطين من البشر يقترب من منصة زاهاك بخطوات عرجة , صعد الرجل العجوز على المنصة وقابلتة نظرات انزعاج من الفتيات الجميلات , باوع زاهاك بهدوء وكال بلهجة ساخرة واثقة ( كيف دخلت هنا أيها المسخ الاجرب ؟ ) .
 
باوع العجوز بنضرات مريبة وكال بصوت اقرب لصوت الثعبان ( مررت بعرجتي هذه عبر مسوخ جرب كثيرين يرتدون قلنسوات مضحكة ويقفون كان على كروشهم الطير يحرسون ما يلقبونه بابن كوش العظيم .. فتملكني فضول لرؤية ابن كوش هذا .. واذا بي اجده مستلقياً كانه البغل وسط الاناث حتى صار واحدة منهن .. لا سيف يسن .. ولا رمح يعد ) .
 
خلت الفتيات ايديهن على كلوبهن وتحفزوا الحراس داير مداير زاهاك وتوجهت كل الأنظار لزاهاك , الي وكف بسرعة من مجلسة وخطف واحد من رماح الحراس وغرسة بكلب العجوز بسرعة كانها رمشة عين وكع العجوز مثل الحجارة وكال زاهاك بغضب ( القوا هذا الحثالة الى الأسود .. واعتذروا لها عن هذا اللحم العفن الذي سنطعمها إياه اليوم ) .
 
شال الحراس العجوز وشمروا بحفرة قريبة واسعة مزينة جدرانها برسومات الأسود الي تعتبر رمز من رموز الحظارة البابلية نهش الأسود جثة العجوز قبل ان تحط على الأرض بسبب شدة جوعها ووحشيتهة .
 
بعدين كال زاهاك بغضب ( القوا حراس المنصة كلهم وراءه .. يبدو ان ابي كوش العظيم لا يعرف كيف يختار رجاله ) .
 
غادر زاهاك المنصة ودخل للقصر وبدة يعنف أي احد يشوفة بطريقة ووصل لغرفتة العظيمة ودخللها وسد الباب بقوة وتفاجئ بصوت كانة صوت ثعبان يكول ( لم اعد اذكر ان لك اسماً يا ابن كوش العظيم ) .
 
باوع زاهاك لمصدر الصوت وتفاجئ بوجود رجل عجوز كسيح قبيح المنظر شكلة اقرب للشياطين من البشر .
 
ولهنا ينتهي هذا الجزء من القصة .

قناة شخصيات مٌميزة على اليوتيوب .

صفحة شخصيات مٌميزة على الفيسبوك .

صفحة شخصيات مٌميزة على الانستاكرام .

حسابي الشخصي على الانستاكرام , اذا كنت تريد عمل فديو بنفس طريقة شخصيات مميزة تفضل بالدخول .

قناة شخصيات مٌميزة على التلكرام .

للتبرع على الباي بال .