زاهاك وإله النور | الجزء الثاني

 

اذاً انتهة الجزء السابق لمن دخل زاهاك لغرفتة وتفاجئ بوجود نفس العجوز القبيح داخل الغرفة ، والي هوة اصلاً قتلة قبل لحظات .. بس حالياً رح نترك زاهاك والعجوز وننتقل لأحد ضواحي بابل الجميلة .

 

والي چان موجود بيها فد رجل واضح انة يرتدي ملابس ملكية ويمتطي صهوة جواد اصيل ، ويحيط بي مجموعة رجال واضح انهم حراس اشداء .. هذا الرجل هوة ( أونس ) مستشار الملك .

 

والي اجة للمدينة حتى يبلغ أهلها بأوامر الملك الي متنتهي .. چانو الناس محتشدين كدامة بقلق وملل وچان ( سيما ) ناظر خيول الملك واحد من المحيطين بالمستشار أونس .

 

وبهاي لحظات القلق والملل واذا بصوت جواد يشق الهواء ويقترب بسرعة مجنونة .. التفتت الة رؤوس الأهالي بدهشة وتبعتهم رؤوس الوفد الملكي بغضب .. وبعد لحظات تحولت كل دهشة الى اعجاب وكل غضب الى دهشة .. والي غير تعابير القوم بهلشكل مو الجواد السريع الفارس الي چان يمتطي الجواد والي تبين انو هذا الفارس هوة ( سميراميس ) .

 

(( هل فاتني شيء ))

 

كالتها سميراميس بمرح وثقة ميجتمعون الا عندها .. وخلينة نترك الصمت الي لحق عبارتها ، ونترك نظرات الأهالي لبعضهم والي تحمل معاني الدهشة والاعجاب بنفس الوقت ، وننتبه على المستشار أونس الي سقط منة لباس الصرامة الي چان على وجهة ، والي سرحت عيونة بجمال ورقة وانوثة سميراميس .

 

( كيف تركضين بالفرس بهذا الجنون في ضواحي المدينة وكيف تتخلفين عن حشد الملك ) .

 

( لقد امرتني ان اروض الحصان " ليجيش " يا ابي .. وهاهو امامك كالمهر ) .

 

كالتها وچانت بعيونها نظرة انثوية للمستشار " أونس " والي چانت هاي النظرة كافية حتى تقظي على الي تبقى من رزانتة ، وكال بصوت خافت ( فلينصرف كل منكم الى متاعه ) .

 

تحرك الحشد واستدارت " سميراميس " بجوادها لكن صوت " سيما " الهادر وكفها .

 

( شميرام تعالي الى هنا واعتذري الى المستشار أونس .. فقد افسد قدومك حديثه )

 

نزلت سميراميس من جوادها واقتربت من أونس وچانت تنظرلة نفس النظرة الساحرة .. الي زلزلتة هاي المرة وصار وكأنة هوة الغلطان الي يريد يعتذر .

 

نزل من جوادة وكال ( شميرام .. ان تقبلي الزواج بي هو الطريق الوحيد الذي سيجعل قلبي يسامحك على ما فعلته به )

 

باوعت سميراميس على " سيما " الي چان يباوعلها بنظرة ابوية مشجعة .. ورجعت باوعت على " أونس " .. رجل قوي ومنصبة هو المنصب الأعلى بالدولة .. نحت كلبها واستخدمت عقلها ووافقت .. وصارت سميراميس باليوم الثاني زوجة " أونس " المستشار الأعلى للملك " كوش العظيم " .

 

بعد ما أصابت زاهاك الدهشة والحيرة بسبب العجوز الا انو زاهاك استعاد رباطة جأشة وغضب غضب شديد وتحفزت عضلاتة وهجم على العجوز هجمة ثائرة .. العجوز متحرك من مكانة شعرة .. والاغرب چان يباوع لهجمة زاهاك بسخرية .

 

وصل زاهاك للعجوز بكل سرعة محاولاً ضرب العجوز ، الا انو هجمة زاهاك انتهت بدهشة عظيمة وباوع على العجوز ممصدك الي شافة .

 

مر زاهاك اثناء الهجمة من خلال العجوز كانما مر من الهواء لكن الغريب هو ردة فعل زاهاك .. ردة فعلة مجانت مرتعبة بكد ما چانت متحيرة .. حسم امرة وقرر انو يتاكد من الي صار واخذ المشعل الي يضيء الغرفة وشمرة بكل قوة على العجوز الي ينظرلة بسخرية .. وشاف شلون المشعل مر من خلال جسم العجوز كانما يمر من خلال الهواء .. وهنا تحولت نظرة العجوز لنظرة مخيفة ومرعبة خلت المشعل ينطفي .

 

بدأ عقل زاهاك البابلي القديم يفكر لان ميعرف شيسوي .. لكن العجوز هوة الي تحرك هاي المرة وباقل من طرفة عين اخذ العجوز المشعل .. وصار العجوز اثنين بعدين ٤ بعدين ١٠ وبقة يتضاعف العدد الى ان انملت الغرفة وزاهاك بدة يتراجع وعقلة غير قادر على تفسير الي ديصير .. وبهاي اللحظة القو العجزة كلهم المشاعل برمية رجل واحد باتجاه زاهاك .. الي تعثر ووكع واشتعلت النار بالغرفة حول زاهاك .. وبهاي اللحظات جان العجوز يقرة أفكار زاهاك .. والعجيب انو الي چان يملي راس زاهاك هو الغضب والإصرار على هزيمة هذا الكيان الي ملكالة تعريف .. وهذا هوة الي چان يزيد اعجاب العجوز بزاهاك .. وفجأة تحول اكثر من ٥٠ عجوز الى واحد وبدة يتقدم باتجاه زاهاك وسط النيران وكال بصوت اقرب لفحيح الثعبان .

 

( لا تزعج نفسك بالتفكير بعقلك القاصر يا ابن " كوش " فلا قبل لك بي )

 

كال زاهاك ( من .. من انت يا هذا ؟ )

 

جاوبة العجوز ( انا " لوسيفر " امير النور يوم خلق النور )

 

وفجأة انطفت النيران وكأنها چانت وهم قاسي واكمل لوسيفر كلامة ( انت المختار يا ابن كوش .. انت من اختاره نوري وبصيرتي .. بي وحدي ستكون اعظم اهل الأرض .. وبي وحدي ستتعلم سر الـ " ماجي " .. وبي وحدي ستملك الأرض بانسها وجنها وكنوزها )

 

حاول زاهاك يتحدث لكن منعة لوسيفر واكمل ( ليس سواك يصلح ليكون جبار الأرض .. ليس سواك يصلح ليقود هؤلاء النعاج .. ليس لسواك ان يتعلم سر الـ " ماجي " فلو اردت ان يحصل كيانك الفاني على كل تلك القوة التي لم ارك منها سوى مثقال ذرة .. أئتني عند جبل دنباوند .. واسال الصبية هناك عن " لوسيفر " وسياتون بك الي ).

 

بعدها اختفة العجوز وكانة چان مموجود اصلاً .. تارك زاهاك بصدمة .. صدمة رح تغير كل حياتة .

 

جبل دنباوند .. بظلمة الليل الدامس شاب وسيم يمشي على سفح جبل مظلم يدور على صبية .. واي صبية رح يكونون موجودين بهيچ مكان .. الي كل شوية يتهئلة بانة يشوف ظلال شبه بشرية تظهر وتختفي .. حس زاهاك بالظجر وازداد غظبة وصاح باعلى صوت ( أيها العجوز ها انا ذا في دنباوند .. اين تراك تكون )

 

مسمع زاهاك أي رد سوى صدى متكرر لصوتة أضاف لهاي الأجواء الساكنة لمسة مقلقة .. بعد لحظات بدة يشعر بانة مو وحدة وبدة يحس باشياء داير مدايرة .. ضيق زاهاك عينيه الوسيمتين وبدة يلاحظ دايرة مدايرة اكو عيون .. عيون تلمع كانها عيون ذئاب .. جانو بكل مكان كدامة وخلفة وعلى يمينة وعلى يسارة عيون واضح انها مو اليفة .. والعجيب انو زاهاك مجان يشعر بالخوف ولا بالقلق .. وصاح بيهم بصوت قوي صياح المعاتب ( اين هو " لوسيفر " اين من يطلق على نفسه امير النور ) .

 

وهنا بدة يشوف أجسادهم الصغيرة .. جانو حوالي مئة يحتشدون حوالية وينظرون باتجاهة نظرة جمود .. بدو يمشون كلهم باتجاه الشمال وجان زاهاك يمشي وراهم .. الى ان اوصلو زاهاك لغار بسفح الجبل ونقسمو مسوين ممر .. باوعلهم زاهاك ومشى بنصهم حتى يدخل للغار .. ومثل ما وعدة لوسيفر.. چان بانتضارة .

 

مجان عجوز ولا جان اعرج جان بكل بساطة لوسيفر والي ما الة أي وصف ثاني غير انه لوسيفر .. كاعد على كرسي جبير يلفة الضلام رغم وجود مشعل او مشعلين .

 

وبهاللحظة دب شي من الرعب بكلب زاهاك .. لان چان متيقن انو الكيان الي كدامة مو بشري وچان يتسائل ( ما هذا الكيان بالضبط ؟ هل هو الرب على عرشه ) مكدر زاهاك انو يستنتج بانة واكف اما الشيطان لوسيفر مچان يعرف بانة واكف امام ابليس بعينه .

 

كال لوسيفر بصوت هادر كالصخر ( لقد اخترتك يا زاهاك من بين رجال الأرض كلهم .. فبرغم انك تستمرء الحياة الدعة الا ان لديك قلباً ميتاً لا يخاف .. قلب شجاع .. وروح متمردة )

 

شعر زاهاك بالعرق يندي جبينه من هول الكيان الي كدامة وكال بصوت خافت ( اخترتني من اجل ماذا )

 

جاوب لوسيفر بغضب الي معرفلة زاهاك سبب ( لتملك بني الانسان .. لتكون اول بشري يتعلم سر الـ " ماجي " ولكن ) سكت لوسيفر للحظات بعدين كال ( يجب ان اضع قلبك الميت هذا تحت الاختبار .. فسر الماجي العظيم لو ناله الرجل الخطا .. سيموت من فوره ) .

 

اشعلت كلمة الاختبار بنفس زاهاك نوع من التحدي وكال ( ما هو هذا الـ " ماجي " الذي لا تكف عن ترديده ؟ وما هو هذا الاختبـ.. )

 

قاطعة لوسيفر فجأة ( ان تراني ) مفتهم زاهاك شي وبدة يريد يسال اكثر الا انو لوسيفر اكمل بلهجة مخيفة ( ان تراني ولا ترتعد .. فان كشفت لك عن وجهي وطرفت عينك طرفة خوف واحدة ساقتلك على الفور .. وان رايتني ولم تجفل فان سر الـ " ماجي " من حقك وحدك وسيطوى لك العالم وتخضع لك نفوس البشر كلهم ).

 

سكت زاهاك سكوت طويل بعدين كال ( فلتكشف عن وجهك اذن يا هذا ) .

قناة شخصيات مٌميزة على اليوتيوب .

صفحة شخصيات مٌميزة على الفيسبوك .

صفحة شخصيات مٌميزة على الانستاكرام .

حسابي الشخصي على الانستاكرام , اذا كنت تريد عمل فديو بنفس طريقة شخصيات مميزة تفضل بالدخول .

قناة شخصيات مٌميزة على التلكرام .

للتبرع على الباي بال .